ആഗോളതലത്തിൽ കുതിപ്പ് തുടർന്ന് 'ബെത്‌ലഹേം'; വിദേശ വിപണിയിൽ നിന്ന് വാരിക്കൂട്ടിയത് 138 കോടിയിലേറെ

സമൂഹ മാധ്യമങ്ങളിലും ബോക്സ് ഓഫീസിലും പുതിയ ചരിത്രമെഴുതി മുന്നേറുന്ന മലയാള സിനിമ 'ബെത്‌ലഹേം കുടുംബ യൂണിറ്റ്' വിദേശ മാർക്കറ്റുകളിലും വൻ വിജയം നേടുന്നു. പ്രമുഖ ബോക്സ് ഓഫീസ് ട്രാക്കർമാരായ സാക്നിൽകിന്‍റെ കണക്കുപ്രകാരം, ഗിരീഷ് എ.ഡി. സംവിധാനം ചെയ്ത ഈ നിവിൻ പോളി ചിത്രത്തിന്റെ ആഗോള ബോക്സ് ഓഫീസ് കളക്ഷൻ ഇതിനോടകം 330.86 കോടി രൂപയാണ് പിന്നിട്ടിരിക്കുന്നത്.

ചിത്രത്തിന്റെ ആകെ കളക്ഷന്റെ 42 ശതമാനത്തോളവും വിദേശ മാർക്കറ്റുകളിൽ നിന്നാണ് നേടിയെടുത്തിരിക്കുന്നത്. നോർത്ത് അമേരിക്ക, മിഡിൽ ഈസ്റ്റ്, യുകെ-അയർലൻഡ്, ഓഷ്യാനിയ തുടങ്ങിയ പ്രധാന അന്താരാഷ്ട്ര കേന്ദ്രങ്ങളിൽ നിന്നുമാത്രം ചിത്രം വാരിക്കൂട്ടിയത് 138.45 കോടി രൂപയാണ്. ഈ വർഷത്തെ തെന്നിന്ത്യൻ റിലീസുകളിൽ ഓവർസീസ് കളക്ഷനിൽ ഏറ്റവുമധികം പണം വാരിയ ആദ്യ അഞ്ച് ചിത്രങ്ങളിൽ മൂന്നെണ്ണവും മലയാളത്തിൽ നിന്നാണെന്നത് ഇൻഡസ്ട്രിക്ക് വലിയ അഭിമാനകരമാണ്.

വിദേശ കളക്ഷനിൽ 138.45 കോടി നേടി ബെത്‌ലഹേം ഒന്നാം സ്ഥാനം അലങ്കരിക്കുമ്പോൾ, 111.70 കോടി നേടിയ മറ്റൊരു മലയാള ചിത്രമായ 'ദൃശ്യം 3' ആണ് രണ്ടാം സ്ഥാനത്തുള്ളത്. മൂന്നാം സ്ഥാനത്ത് വിജയ് നായകനായെത്തിയ 'ജനനായകൻ' 93.50 കോടിയും, നാലാം സ്ഥാനത്ത് 85.55 കോടി നേടിയ മലയാള ചിത്രം 'വാഴ 2' വും ഇടംപിടിച്ചു. സൂര്യ നായകനായ തമിഴ് ചിത്രം 'കറുപ്പ്' 81.15 കോടിയുമായി അഞ്ചാം സ്ഥാനത്താണ്. ബെത്‌ലഹേമിന്റെ ഇന്ത്യൻ ഗ്രോസ് കളക്ഷൻ 192.41 കോടി രൂപയാണെന്നും റിപ്പോർട്ടുകൾ വ്യക്തമാക്കുന്നു.

യൂട്യൂബിലും ഒടിടി റിലീസുകൾക്ക് ശേഷവും വലിയ ചർച്ചയായിമാറിയ ഈ ചിത്രം, മലയാള സിനിമാ ചരിത്രത്തിലെ എക്കാലത്തെയും വലിയ വിജയങ്ങളിലൊന്നായാണ് വിലയിരുത്തപ്പെടുന്നത്. മമിത ബൈജു നായികയായെത്തിയ ചിത്രത്തിന്റെ ഈ അന്താരാഷ്ട്ര ബോക്സ് ഓഫീസ് കുതിപ്പ് മറ്റ് ഭാഷാ സിനിമകൾക്കും കടുത്ത മത്സരമാണ് സമ്മാനിച്ചിരിക്കുന്നത്.

Content Highlights:  Bethlehem has crossed ₹138 crore in overseas collections, marking a major box-office milestone. The film's strong performance in international markets has contributed significantly to its overall theatrical run.